Martxoaren 19an, belaunaldien arteko topaketa egin da Arrasateko Kulturateko areto nagusian, Arizmendi Ikastolako Lanbide Heziketako ikasleen eta Leintz Ibarreko adinekoen parte hartzearekin. Aldi berean, Debagoieneko Mankomunitateko eta Leintz Bailarako udalerrietako hainbat ordezkari ere bertaratu dira.
Jardunaldiak, Bizitza Betearen ikuspegia jarraituz eta belaunaldi artekotasuna ardatz hartuta, Arizmendi Ikastolako Lanbide Heziketako ikasleek adinekoei eskaintzen dizkieten tailerren aurrerapenak aurkezteko balio izan du. Belaunaldien arteko loturak sendotzea eta adinekoen bizi kalitatea hobetzea helburu duen ekimena da, gazteekiko lankidetzaren bidez.
Joan den ikasturtean Arizmendi Ikastolak, Helduak Adi! eta Bizipoz elkarteekin batera bultzatutako proiektuak Gipuzkoako Foru Aldundiaren babesa izan du, Etorkizuna Eraikiz programaren barruan. Helburu nagusia da elkarrekin ikasteko espazioak eskaintzea, ezagutzak eta beharrak elkar partekatu, gizarte inklusiboagoa eta solidarioagoa sustatzeko.
Ekimenak funtsezko hiru ardatz
Bizitza Betea: Zahartze aktibotik haratago, adinekoen behar guztiei erantzun nahi zaie: zahartzaroa aldatu den neurrian, adinekoekiko begirada ere aldatu.
Belaunaldiartekotasuna: Elkarrekin ikasteko espazioak sustatzen dira, non gazteak eta adinekoak lankidetzan aritzen diren adin guztietarako gizarte bat eraikitzeko.
Zerbitzurako ikaskuntza: Ikasleek komunitatean benetako eragina duten proiektu praktikoetan parte hartzen dute, beren prestakuntzarako funtsezko gaitasunak garatuz.
Hamabost tailer abian
Programaren parte gisa, Osasun Larrialdietako, Mikroinformatikako, Erizaintzako eta Gizarte eta Kirol Animazioko zikloetako (GIKAI) ikasleek adinekoei zuzendutako 15 tailer jarri dituzte abian. Jardueren artean daude, besteak beste, lehen sorospenei, tresna digitalen erabilerari, ongizate fisikoari eta erorikoen prebentzioari buruzko prestakuntza.
Saioak Arizmendi Ikastolak Ferixalekuan dituen instalazioetan egiten ari dira, baina eguneko zentroetara ere lekualdatu dira, hala nola Aita Menni, Atarte, GSR eta Jose Aranara, Eskoriatzan, mugitu ezin direnei prestakuntza hurbiltzeko.
Etorkizuna duen proiektua
170 adinekok baino gehiagok eman dute izena, eta proiektuaren harrera oso positiboa izan da, bai ikasleen aldetik, bai parte-hartzaileen aldetik. Erantzun ona dela eta, bultzatzaileek adierazi dute ekimen hori sendotu eta zabaldu nahi dutela etorkizunean.
Izena emateko epea zabalik dago oraindik, eta parte hartu nahi dutenek helbide honetara idatzi behar dute: adinarte@arizmendikide.net.
- BELAUNALDIEN ARTEAN BIZITZA BETEA - 24/03/2025
- PARTE-HARTZE SOZIALAREN ERRONKAK ZAHARTZAROAN - 09/01/2025
- Adinekoenganako adinkeriarik gabeko komunikazio-gida - 12/11/2024